Batys Qazaqstan oblystyq Kóp beıindi  balalar aýrýhanasy 1997 jyly oblystyq densaýlyq saqtaý basqarmasynyń buıryǵymen alǵash 65 tósek-orynǵa arnalǵan balalar hırýrgıasy bólimi bolyp ashylsa,  onyń  20-sy lor bóliminiń naýqastaryna arnalǵan edi.

Sol jyldary Batys Qazaqstan Oblystyq balalar aýrýhanasynyń basshysy bolǵan Q.Irmenov, bólim meńgerýshisi qyzmetin atqarǵan dáriger-hırýrg V.Harkın, dáriger travmatolog-ortoped M.Jýmabaev, dáriger-hırýrg A.Gehman, hırýrg-ıntern A.Tólegenov, lor dárigerler T.Nuryshev pen J.Aıbatýllın, dáriger anestezıolog-reanımatologter E.Toqsanov, N.Kım, J.Imanǵalıev jáne alǵashqy operasıalyq meıirbıkeler N.Bondarenko, N.Jıvoglád sekildi mamandar búldirshinderdiń densaýlyǵyn saqtaýda aıanbaı eńbek etken. Bastamasynda josparly hırýrgıalyq kómek kórsetilgen. 1998 jyly travmpýnkt ashylǵannan keıin, oblys balalaryna táýlik boıy shuǵyl kómek kórsetile bastaǵan. Keıin balalar ýrologi R.Ajǵalıev, balalar hırýrgi S.Borambaeva jáne G.Eláevalar jumysqa alyndy. Oblystyń dáriger-hırýrgteri  Iý. Hvan, N. Klımenko, S. Jıdebaev, S.Haırekeshevter oblystyq balalar aýrýhanasy hırýrgıa bóliminiń qyzmetine ózindik úlesterin qosty.

          Dárigerler men  meıirbıkelerdiń barlyǵynda derlik  joǵarǵy jáne birinshi sanattary  bar. Olardyń altyn qoldarynyń arqasynda myńdaǵan pasıentter ońalyp, ondaǵan, júzdegen balalardyń ómiri aman saqtalyp qaldy. Ustazdar men jańadan qabyldanǵan jas mamandar arasynda urpaqtar sabaqtastyǵy jalǵasyp ta keledi. Qazirgi kezde hırýrgıa jáne travmatologıa bóliminde bolashaǵynan úlken úmit kúttiretin jas mamandar jumys jasaıdy.

          Elbasynyń «100 mektep, 100 aýrýhana» baǵdarlamasy aıasynda salynyp, qoldanysqa berilgen Kóp beıindi oblystyq balalar aýrýhanasy qazir mamandandyrylǵan, zamanaýı qural-jabdyqtarmen (laparaskopıalyq baǵan, «ERBA» elektrhırýrgıalyq qondyrǵysy, jańa týylǵan nárestelerge arnalǵan ota jasaý ústeli, atravmatıkalyq tigýge arnalǵan materıaly jáne qýatty ota jasaý zaldary) tolyq qamtamasyz etilgen medısınalyq uıym bolyp tabylady. Kóp beıindi oblystyq balalar aýrýhanasynyń tájirıbeli dáriger-hırýrgteri jańa týylǵan náresteler hırýrgıasy, balalar ýrologıasy, travmatologıa-ortopedıasy boıynsha joǵary mamandandyrylǵan medısınalyq kómek kórsetýde. Ota jasaýdyń jańa ádis-tásilderi (endoskopıalyq) engizilip qoldanylýda, kombýstıologıada erkin kesindili aýtodermoplastıka jasalady, travmatologıada balalardaǵy Beıkker sarysýly isigin pýnksıalyq emdeýdiń jańa tásili arqyly emdeıdi. Dárigerler «Bolashaq» baǵdarlamasymen Ońtústik Koreıada, sondaı-aq Astana, Almaty, Aqtóbe qalalarynda oqytylýda.

Gúlim AQAP,

Batys Qazaqstan oblysy